ياشعر

**فتى الجادي** · 20-08-2011, 12:33 PM

ياشعر قلّطها دلالك صاحبك قاطع طريق
خلّه يتقهوى لو همومه بالقصايد تخنقه

أي والله انّك يالشعر ما انته عدو ولا صديق
يوم اذكرك ذكّرتني بالليله (المتعسبقه)

الليلة اللي شلّت الفرحة وضوّت ألف ضيق
يوم انهدم قصر الامانه وانشرخ صرح الثّقه

ما خلّفت ياغير همٍّ أبلعه مع كل ريق
يوم المآسي عزّمت (تدغش) وبابي تطرقه

ومرحوم ياعهدٍ تهاوى من وسط صدر العشيق
مثل الدموع ليا تهاوت من عيونٍ تدفقه

مثل الحلوم المفزعه من شافها مفزع يفيق
آترجم اضغاث الحلوم الكاذبه لا الصادقه

خاويت ليل أسهره والليل للعاشق رفيق
يجبر خواطر ناس صارت من ضحايا التفرقه

آراءنا متضاربه في الحب لي جمّه عميق
لين اتّضح امرٍ جلي اذوى غصونٍ مورقه

وانا اشهد انّي يوم سقت خطاي لي عزمٍ وثيق
اطمح واحب المستحيل ولو حدوده مغلقه

ومادامها جتني كذا برد والصابر يطيق
مالي بحبٍ في قلوبٍ واهيه ومنافقه

وياشعر يوم انّي زهمتك من ورا ذاك الطريق
ابغيك تدري بانّني غيّرت عاده مسبقه