أريد مساعدتكم

**crazy girl** · 22-04-2011, 01:09 PM

بسم الله الرحمن الرحيم
اولا السلام عليكم
قربت الاختبارات وأنا ما فهمه شي من دروس الفيزياء
أريد مساعدتكم
والله ما فهمه شي
دروس الفيزياء للصف العاشر
لا تنسوا ردودكم

**Miss.java** · 22-04-2011, 03:29 PM

وعليـــكمـ السلام ورحمة اللهـ وبركاتهـ ~

حيــآج اللهـ خيتي Crazy Girl في القسم التربوي ..
الفيزيـــاء مادة جداً لذيذة ..

أول ركن أساسي عشان تقدري تحبي المادة وتذاكريها وتفهميها هو إنج تحبي هالمادة ..
والمعلم له دور طبعاً ..

استعيني بملخصات من المعلمات .. وأي شي بسيط ما تفهميه ع طول اسألي المعلمة ..

بس الحين انتي كنج متورطه ، لأن الاختبارات قربت وانتي ما فاهمه شي ..

الحل:
1. اطلبي من المعلمة ملخصات وذاكريها وأي شي ما تفهميه ع طول سألي المعلمة (أي معلمة فيزياء مب شرط معلمتج)
2. ذاكري الأسئلة اللي تجي في آخر كل فصل في الكتاب ، عادة هالأسئلة تختصر كل الأفكار الموجودة
3. وذاكري مع زميلة لج ، أو مع مجموعة بنات
4. الفيزياء خيااااااال ، يعني شغلي مخيلتج وبتنجحي
5. افهمي القوانين (بعدين حفظيها) ، وراح تفهمي كل الأفكار بإذن الله

عااااد هذا اللي عندي .. والأهم من كل هذا إنج تتوكلي على الله وتآخذي بالأسباب ..
رآح تتعبي بس تعب حلو ..

ربي يوفقكم ..

أتمنى لو حد من الأعضاء أو الإدارة يقدر يساعد بنتنــآ بملخصات وشرح ..
وها دورك مشرفنـــآ الفليتي ..

**دمع القلوووب** · 22-04-2011, 03:34 PM

هلا اختي ,, تفضلي ولا تشيلي هم ,, الفيزيا مادة سهلة فلا تتعقدي منها او تتخوفي .. بالعكس حاولي تقري الدروس والشرح وتطبقيها بعدة مسائل بتفهميها ان شاء الله

اممممم عندي خبرة بالفيزياء بس ما لذاك الزود حاليا (مخلصين الدراسة من زمااان ) ما شفت قوانين او شرح بس اذا تعطينا الدرس او المسألة فاقدر اساعدج شوي
واتمنى تكون دروسكم قريبة من الدروس الي خذيناها بزمانا
عطينا الدرس او المسألة وانشاء الله بنحاول نفيدج قدر المستطاع وبعد الاعضاء اللي بنفس صفج يمكن يساعدوج اكثر واكثر

لا يأس مع الحياة ولا حياة مع اليأس

**دمع القلوووب** · 22-04-2011, 03:37 PM

ما شاء الله عليج امشرفتنا جافا ما قصرت سبقتنا وقالت المفيد

صح اختي خذي بنصيحتها وان شاء الله بتقدري تفهمي هالمادة واهم نقطة مثل ما قالت اختنا جافا وهي افهمي القوانين اولا بعدين احفظيها
لان بالفهم بتحلي والحفظ يساعد فقط ,, فهمج للقانون هو نصف الحل

بالتوفيق اختي وان شاء الله المشرف الفليتي يكون له الدور الامثل في مساعدتج بعد مدرسيج وربعج

**بنت مسندم** · 22-04-2011, 03:56 PM

على فكرة حتى انا مااااافاهمة شي
بس ان شاااء الله بنستفيد من نصاااائح الاخت

**قصيد** · 23-04-2011, 04:43 PM

أنا وحدة ماكنت أحب مادة الفيزياء وكنت أحاتي شو أسوي بس صدقيني حبج لشرح المعلمة وحبج للمادة او محاولة فهم المادة هو الطريق اللي تقدرين من خلاله تنسين شي اسمه صعب

حاولي تجمعين اكبر عدد من امتحانات السنوات الماضية وتبدين من البداية وطبعا في بالج شي واحد انج راح تحاولين تفهمين المادة

شوفي البنات اللي تحسين انهم بينفعونج في فهم المادة وحاولي تتواصلين وياهم

يوم تحبين اتذاكرين المادة ذاكريها بجو هادي لان أساس الفيزياء ( فهم وبعدين حفظ)

ارسمي لنفسج طريقة بسيطة عشان تقدرين تدخلين جو مادة الفيزيا واذا حسيتي انج قربتي من فهمها راح ترتاحين وبروحج راح تتشجعين وتكملين للنهاية

حاولي تتواصلين مع معلمتج واشرحي لها أسباب عدم فهمج، صدقيني ماراح تقصر، ولا تستحين منها لانها في الآخر هي معلمتج

الفيزياء قوانين ولاتحفظينها لانج بتنسيها ، حاولي ادورين مبدأ وأساس كل قانون وكيف توصلتي له وعقب افهميه وبدون ماتحسين راح تلاحظين انه أبسط من البساطة

حبيبتي التجربة اكبر برهان وانا كنت شراتج محتارة بس مافادني شي غير اللي كتبته لج فوق وكملت مشواري وحبيت الفيزياء ونجحت ولله الحمد

اهم شي اتركي الخوف وفكري كيف تبدين المذاكرة مع هالمادة

والله يوفقج حبيبتي

**بلسم** · 24-04-2011, 01:16 AM

أولا: الله يساعدج..

ثانيا: الففيزياء سهل.. مثل ما ذكروا الأخوات..........

أسهل طريقة الملخصات..راح تفهمين المادة بدون عناء .وبدون تعقيد.. بتحصليها عند المعلمة
أو من النت...

وبعدين ابدي بحل المسائل ..استعيني بالاجابات الجاهزة..عشان لا تعقدين اكثر.. وعشان تجمعي أكبر عدد من الافكار...

لأن المسائل مجرد أفكار...

وشدي الهمة.

والخوف ما راح يحل مشكلتج

أهم شي تسويلج جدول ...تراجعين فيه ...

والله الموفق

نبرااااااااس

**Miss.java** · 24-04-2011, 01:53 AM

خيــتي Crazy Girl و بنت مسندم ..

شو رآيكم تحطو أسألتكم لنا .. وإن شاء الله نقدر نساعدكم ~

**ملكهـ باحساسي** · 25-04-2011, 12:54 PM

وعليكم السلام ورحمة الله وبركاتهـ
الله يعينكم ان شاء الله اختي
بس هذا الشي بعد يرجع لشرح المعلمة اذا كان شرحها okوالا لا.؟؟؟؟؟؟؟؟؟

**Mazin Nasser** · 27-04-2011, 03:06 AM

أعذرونا ع التأخير في الرد .. ف مثل ما تعرفوا أوقات امتحانات والناس منشغله شوي ..

بالنسبة لج أخت Crazy Girl وبنت مسندم خلو ف بالكم انو امتحانات الصف عاشر راح تكون من الوزارة ..
هذا يعني انكم لازم تكونوا مستعدين أكبر استعداد لمتحان العلوم صف العاشر ..

ومنهج العلوم في الصف العاشر مقسم ع حد علمي إلى الفيزياء والكيمياء والأحياء (مدموج)
يعني الأسئلة ف الامتحان راح تكون موزعه على تلك المجالات .. اللي يقلل من تركيز الفيزياء ف الامتحان

والاسئلة اعتقد بتكون مبسطه جدا جدا هذي السنة للظروف اللي مرت فيها ..(احتفالات العيد الوطني) . والتأخير في المنهج وما إلى آخره ..
ومما يسهل الاختبارات انه تم دمج الفصلين الأول والثاني .. ها الكل متعارف عليه ..

الحين .. الخطوات اللي عليكم تتبعوها اخت Crazy Girl وبنت مسندم بكل بساطه ...
تذاكري الكتاب ( خاصة وحدة الفيزياء ) .. واللي ما فهمتيه .. ارجعي للمعلمة ..

وعندي حلول اختبر فهمك ف الكتاب الموجوده في وحدة الفيزياء..
أتمنى تذاكري الوحده زين زين .. وتحلي اختبر فهمك الموجود .. وتحلي أسئلة التقويم والمتابعه .. وترجعي للملخص ع أساس تتأكدي من حلولج ...
ومثل ما قلت لج .. باقي ها الاسبوع دراسة ،، إرجعي للمعلمة كثر المستطاع (يعني لا تطلعي من غرفة المعلمات أبد) ^_^ أمزح عاد ..

أتمنى تستفيديوا من كلام الأخوه والأخوات .. لأن نصايحهم جدا جدا جدا مهمه ،،

وهااي حلول اختبر فهمك

وبعد في اختبارات السنوات الماضية مع نماذج الاجابة بدرجها.. حلي الاسئلة .. وتأكدي من الحل وشوفي خطوات الحل ،، وراجعي المعلمه أهم شي ,,
علوم - العاشر.rar

أشكر الاخوه والاخوات ع التفاعل بالموضوع ..

بالتوفيق للجميع ...
مع آمآلي الساخنه بالتوفيق والنجاح .. والدرجه النهائية ف كل الامتحانات

وإذا في اي إلتباس .. نحنا موجودين .. وف الخدمة