الدرس الثاني (Photoshop): إنشاء و فتح ملف في برنامج Photoshop

[Miss.java]

بسم الله
نبدأ الدرس الثاني في برنامج Photoshop
للحين الدرس الأول والثاني على درجة واضحة من البساطة ..
راح يكون شرحي على الإصدار CS4
وإذا أي حد واجه صعوبه بسبب اختلاف الإصدار يخبرني .. مع إنه ماكو وايد فرق بين الإصدارات

((إنشاء و فتح ملف في برنامج Photoshop))

الملفات التي ينشئها برنامج Photoshop تأخذ الامتداد PSD وسنقوم بإنشاء ملف (صورة) بشكل بسيط وسندخل بالتفاصيل في الدروس القادمة بإذن الله ..في ملفات مرفقة مع الموضوع ،، سيتعين عليكم استخدامها لإتمام هذا الدرس ..
الملفات المرفقة عبارة عن ثلاث صور : (خلفية ، مسجد ، صلاة )


1. من قائمة File اذهب إلى New أو بإمكانك الضغط على كنترول وحرف N وستفتح لك النافذة التالية:


الشكل1

الرقم 1: تسمية الملف الذي ستقوم بإنشاءه (أنا بختار اسم pray)
الرقم 2: الضبط المسبق لقياسات الملف المطلوب (اختر Default Photoshop Size)
الرقم 3: في حالة اخترت Custom من قائمة الضبط المسبق ، سيكون بإمكانك اختيار القياس الملائم لك وحسب الوحدات القياسية الملائمة لك (cm, inches, pixles)
الرقم 4: لون الخلفية الأساسية (اختر اللون الأبيض)

ستفتح لك النافذة التالية:


الشكل2

2. قم بحفظ الملفات المرفقة لديك ، ومن قائمة File اذهب إلى Open أو ببساطه بإمكانك الضغط على كنترول وحرف O ، افتح الملفات كلها ( خلفية ، مسجد ، صلاة )

3. ما يميز الCS4 و CS3 و CS5 عن غيره من الإصدارات هو Workspace ، عند فتحك لكامل الملفات سوف تظهر بالشكل الآتي:


الشكل3


4. الآن أصبحتم جاهزين للعلب بالصور ودمجها ..


ألقاكم لاحقاً لاستكمال ما تبقى من الدرس ~

[فتى كمزار]

درس حلو وسهل شكراا خيتو

بأنتظار درس اللعب ع الصور

أنا برنامجي اصداره قديم cs2

[غرشوبة البحر]

يسلمووووووووووووووووووو

[قصيد]

انا بعد برنامجي اصدار 2

بيكون نفس الشي والله لازم انزل اليديد؟

[عذب المعاني]

تسلمين آختي على طرحج القيم
ومآ قصرتي فـ طرحج

نترقب اليديد

[ما تفهمونه]

http://www.musandam.net/up//uploads/...4ac2dbf06b.gif

[فتى كمزار]

مشرفتنا متى يكون الدرس الثالث إن شاء الله

[Miss.java]

السلام عليكم جميعاً ~

أعتذر ع الانقطاع المفاجئ ..

بالنسبه للإصدار 2 ، ترا ماشي فرق في الأساسيات .. واللي يالسه أشرحه لكم مجرد أساسيات ..
واللي يفرق بين كل اصدار تقريباً workspace وبعض التحسينات
واللي بيواجه صعوبه أو شي يخبرني
بس عموماً ماشي فرق
يعني خيتي قصيـــد ما يحتاي تنزلي اليديد
تمام يا طلاب ؟! هع
واخوي فتى كمزار ما خلصنا الثاني عسب نبدأ الثالث !
يللا نستكمل من حيث وقفنا
بسم الله في أوله وآخره ~

هنـــآ وقفنا



بعدما فتحنا كل الملفات بنبدأ الحين ندمجها (الصور) ونلعب فيها حسب رغبتنا وحسب التصميم اللي نباه .. بس الحين كلكم بتسوووون مثلي عسب أشوف انتاجكم ، تمام يا طلاب ؟!

1. أول شي راح نحط الخلفية وفي عدة طرق لهالشي وبدرج هنا ثلاث طرق وبشرح وحده من هالطرق بالصور :

الطريقة الأولى :
مع وضع المؤشر على (خلفية) واختيار (Move Tool) نذهب إلى قائمة select بعدها إلى All (راح تتحدد حدود الصورة على شكل نقطي)
بعدها نروح من قائمة Edit نختار Copy
بعدها نحط المؤشر على صورتنا اللي نشتغل عليها واللي هي pray.psd
بعدها من قائمة Edit نختار Paste
الحين قمنا بنسخ الصورة خلفية.jpg إلى pray.psd
يعني سوينا الخلفية وانتهى #


الطريقة الثانية :
نفس الطريقة الأولى لكن باستخدام الكيبورد (لأنه أسرع وكنوع من الاحتراف)
مع وضع المؤشر على (خلفية.jpg) ، باستخدام الكيبورد نضغط على كنترول ثم حرف A (راح تتحدد حدود الصورة على شكل نقطي)
بعدها نفس الشي باستخدام الكيبورد نضغط على كنترول ثم حرف C
بعدها مع وضع المؤشر على الصورة اللي نشتغل عليها pray.psd ، نضغط على كنترول ثم حرف V
وبذلك انتقلت لنا الصورة
وانتهى #

الطريقة الثالثة :
وهاي الطريقة اللي أستخدمها شخصياً وايد (أسرع واحتراف وعملية )
مع وضع المؤشر على خلفية .jpg واختيار Move Tool ، أضغط على الصورة دبل كليك وأسحبها لين أحطها في المكان اللي أباه واللي هو pray.psd ، وطول ما أنا ضاغطه ع الصورة يتحول لون السهم إلى أسود كامل ، ولما أوصل عشان أحطها في المكان المطلوب (pray.psd)، يتحدد المكان المطلوب (pray.psd) بخط أسود مع ظهور المؤشر العادي مع علامة + .. وتنتقل الصورة بسلآم وآمان ..
أتمنى واضح الشرح ..

عاد اختارو الطريقة اللي تناسبكم ، وكل طريقة تعطيكم نفس النتيجة ، وخبروني إذا في أي أسئلة أو استفسارات


راح أشرح الطريقة الأولى بالصور :









اممممم
بهالطريقه تعلمنا كيف ننقل الصور أو نسوي لها كوبي بيست بالفوتوشوب ..

نقطه جداً مهمه في الفوتوشوب ألا وهي (Layers)

...

للدرس بقية ~


اللهـ يعينكمـ علي !

[IS-student]

دروس مهمة وأساسية في الفوتوشوب

نتمنى انكم تستفيدوا من الدروس

ومشرفتنا ما مقصرة ما شاء اله عليها

ويا ليت الأعضاء يطبقوا الدروس

ويرفعوه عالمنتدى عشان نشوف وين وصلوا وكيف ممكن نقدر نساعدهم

متابعين لكم ...

[حسن محمد]

بالفعل مشرفتنا ما مقصرة

بس اشوف ماشي تفاعل من الأعضاء

يا ليت ترسلوا رسايل للأعضاء وتخلوهم يتفاعلوا اكثر

ومستعدين نساعدكم

وان شاء الله تحترفوا في الفوتوشوب

ومثل ما ذكر is-student

لازم نطبق عشان نتعلم

متابعين للدورة ...