الشاعر حشر بن الشاعر السعدي ( الجزء الثالث )

هذي بعض القصائد المتنوعة للشاعر
أرجو أن تنال رضاكم


قصيدة 1 :


ياحبني لك ياهواي وحبني لك
حبك سبب في إنفعال العاطفه
هذا الشعور بلهفتي ليته يجيلك
واجب عليك اتخففه وتلاطفه
نارن تلابق فالحشا من لهفتيلك
شرارته من نظرتك هالخاطفه
احساسك اللي فارقن عن حس جيلك
انا كفو لا صرت منك قاطفه
ذوقك رقي الذوق لو هو ينحنيلك
مثل كبتك وماركة معاطفه
تعال لو زعلان لو تشفي غليك
هذا فوادي لين ترضى شاطفه
والزين كله والحسن كله قبيلك
لتلومني في إنفعال العاطفه


كلمات : حشر بن الشاعر السعدي


........................................

قصيدة 2 :

لاتحسب اني يوم قفيت بشنيك
ماهو بطبعي ذم لجواد لو كان
ذقت العذاب وعذبتني امانيك
ورحلت ماخليت لي عنك عنوان
ياما بكيت وقطع القلب طاريك
طاريك كنه سيف والقلب شريان
ساكت ولا بيحت باسرار خافيك
وحشمك لاوالله طاريك ماهان
تبعت دربك لين عفيت خطاويك
محاك وقت ولا محا الحب نسيان
مازلت في نفسي ولو مابقانيك
ولا زلت في روحي مواثيق وايمان
اذكرك لاهاب القمر من نواحيك
وان هب من صوبك من الغرب ذنان
خرس المشاعر بالخوافي تناجيك
يامل قلب حبه اليوم كتمااااااااااااان
يسري لك الهاجس على ذكر ماضيك
مكلوم منفي منهك الحيل شفقان
منساك لو يبدي عليه تناسيك
كذا القدر ياصاح لاعاند انسان
معنى فقدتك والفراق وتجافيك.
عرفتني المقصود من قول حرمان


كلمات: حشر بن الشاعر السعدي


.....................................

قصيدة 3 :

علمني الوقت لا اشره ولا اعتب
ولا احرج النفس في شرهات مخذوله
اليوم زلف كلامك وانته تترتب
دام الحقيقه غدت ماهي بمقبوله
حبر العموله هو اللي فالقلم يكتب
من جف حبر الامانه وراح مفعوله


حشر بن الشاعر السعدي


..............................................

قصيدة 4 :

يغتالني الهم والعربان ماتوحي
ومن قلة الحيل مونس فالحشا كيه
استر الضيق وألبس ثوب لمزوحي
ولو بكشف الثوب بانت الف ماريه
خايف ابوح ويزيد الكيل من بوحي
وافرح بها زبون الواشية فيه
من عقب روغ التفق عالرجم ونزوحي
سرحان عاوي على رجم التميميه
اسلي الخافق اللي كبده اتفوحي
بالقاف اثره مسكت الجمره الحيه
انوح بالقاف لكن من فهم نوحي
والناس تحسب حزاوي شعر عاديه
المشكله مجتمعنا صار مكبوحي
موضة دزاين يسموها ثقافيه
هزهير خلا العرب من وين متروحي
تدوي بلا وعي في دنيا خياليه
اليوم كلمة هلا تعطيك مربوحي
وانا بعد لو بجرب رحت فالغيه
لكن ماهي هواي ولا دوى اجروحي
هواي شومه معا ربعن شميميه
سجة خلا في ربيعن شيحه ايفوحي
وقدامك الارض تتراما على البيه
ياحي باللي يخبن بالخطا افيوحي
كنها طموحن تزيد المشي جبريه
تتوسع النفس وانسى الهم والجوحي
واسبح من الفكر فالقدره الالهيه
واترك خلايق هواها الكذب والتوحي
والنرجسيه وناس البرجوازيه
اروح بالطيب واكسب فيه مصلوحي
وارجع بخفي حنين وصافي النيه
والله لولا هوى الغونه هوى روحي
وابو حشر كان بسكن فالسعوديه


كلمات ؛ حشر بن الشاعر السعدي

.........................................

قصيدة 5 :





العذر يالدوح مامني
والعفو منج ومعذوره
فيج انا بالامس متغني
والقصيد ارتب اسطوره
واما هذا اليوم مشقني
حالج وكل يوم معثوره
في الكراج اصيح واوني
ودونج البيزات منثوره
مارخصتج غير لكني
شفت منج شيء فالصوره
عن دوربي كنج اتثني
وبالكلف مانتي بمجبوره
عاد انا يالدوح وازني
لوليه وقلت ماجوره
ثمه ثنيتي ولومني
حيلتي والنفس مكسوره
وثابني بوشهاب وسعفني
فزعته وحميد مذكوره
دوحتي وش غيرج عني
وللغلا لج فالحشا دوره
كم بذلت المال ما مني
وقلت تستاهل ومشكوره
غير زود الكيل حملني
لي يهد الحيل ويجوره
ذاكر المعروف واكني
وخوتج ماهي بمنكوره
يوم بيض الخود شطني
فالهوى وغيبت فبحوره
للخليل اللي ترك فني
كم لي ضيات مستوره
شيء طرقي وشي متعني
وشي يوم الشوق له فوره
كم سرينا والسها امدني
وعبرتي فالحلق محكوره
خاطري من ضيقه ايزني
كالذي مقبوض من زوره
ذاك وقت ذكره ايبني
عنه نفسي اليوم مغموره
فيه لي خلان ماظني
يذكروني ولا ابا دوره
وكم طرقت عمان واثني
قايم فهلي ومصخوره
موتري وش فيك مااذني
ماتهون وفيك تغيوره
كل ماوديك تكسرني
قال عوقه وسط ماطوره
ياافا يالدوح خبرني
فيك شروى علة العوره
انت عوقك دوم غابني
وعوقها ماشيف دكتوره
من خراف فلوس يدني
وباقي ربيتين مصروره
وش بقا بعده يصبرني
. والفكر منك قصر شوره
كنت لي نوماس تطربني
صاحبن ماتقصر شبوره
وانكسع باعك وتخذلني
والحسايف فيك مسعوره
العذر يالدوح ما مني
رغبتي ذا اليوم مثبوره
قال صبرك صير متأني
حكمة الايام مخبوره
انا اكدك وانته اتكدني
وهكذا القانون دستوره
قلت هذي الحجه اتحجني
وردتك لحساسي الحوره
استريح ولا تودرني
عقتك ماعقت الزوره


كلمات حشر بن الشاعر السعدي

.....................................
وترقبوا المزيد إن شاء الله

تسلم اخوي خالد على الطرح الجميل

أبدع الشاعر في قصايده،،
تسلم ع النقل،،

السلام عليكم ورحمة الله وبركاته

ما شاء الله
صح اللسانه واعتلا شانه
يعطيك العافيه على الطرح وماا قصرت

تقبل مروري

كلمات بغاية الروعة

يسلمو ع طرح الجميل