خميس : الوالدة ، الحمدلله خلصنا إجراءات المطار ، وبنعبر الخرطوم بعد شوي للطيارة .
أم خميس : الخرطوم ؟ انتو قايليلي بنسير تشيكو مب السودان !
خميس : هههههه بنسير التشيك يا الوالدة ، كنت أقصد بنعبر الممر .
( تصل العائلة لبوابة الطائرة ) .
أم خميس : ما شاءالله ، منو هالحلوة ، شحالج فديتج ؟ وشحال أهلج ؟ شو جبيلتج ؟
خميس : الوالدة هذي مضيفة ، خلينا ندش الطيارة وعقب سلمي عليها .
أم خميس : يا ربي أنا وين شايفتنج ؟ الغالية أنتي تمثلين في مسلسل تركي ؟ تشبه لميس الخالق الناطق .. انزين ابويه خميس ، على أي غنف هبنيلس ؟
خميس : ههههههه هذي كراسي مبغنفات .. لحظة بشيك الأرقام .. احنا الحين في البزنس كلاس ، يعني جدام شوي وبنوصل الايكونومي ..
أم خميس : ياااااالله .. الدرب طويل يا ولدي لآخر الطيارة ، أنا بيلس هنيه ، وانتو سيروا وين ماتبون !! أوييييييه حمود وين طبجة البلاليط ؟ ليكون نسيتها في الخرطوم ؟
حمود : لا يدوه ، البلاليط عند عويش ، أنا شال طبجة الخمير .. وسلوم عنده طبجة الهريس .
أم خميس : زين زين ، بنوزع شوية على الجماعة اللي ويانا في الطيارة ، بس ما شاء الله عليهم مثل النمل من كثرهم .. بتصل بالدريول أرشد يمر مطعم خالد حرية الشعبي اييب زيادة .. متى بتطير الطيارة ؟
خميس : يدوه ما باقي وقت ، ربع ساعة ونطير .
أم خميس : أفاااا .. ما عليه يوم بنرد من تشيكو بسويلهم أحلى بلاليط وخبز محد سواه غيري ! وييييييه نسيت أيب دلة الكرك من البيت .. عوذ بالله منك يالشيطان .
خميس : الوالدة الله يهديج اييلسي هنيه وخلي عنج سوالف الأكل الحين .
أم خميس : شووووو ؟! أنا أيلس على كراسي صغيرة مثل المدارس ؟ يعني تخلون الغنفات والراحة وتيبوني هنيه ؟ حشى بينكسر ظهري لين ما نوصل اسمحولي ..
حمود : يدوووووه تعالي وين سايرة !
